Unwaith eto, mae Dyfodol wedi trefnu cyfres o ddigwyddiadau a thrafodaethau drwy gydol wythnos yr Eisteddfod; cofiwch alw heibio’r stondin
RHAGLEN DYFODOL AR GYFER YR EISTEDDFOD
Ateb
Archifau Categori: Dyfodol
CYFARFODYDD DIWEDDARAF DYFODOL I’R IAITH
Bu’n gyfnod o siarad a thrafod i’r mudiad yn ddiweddar, gyda thri chyfarfod allweddol yn cael eu cynnal yr wythnos ddiwethaf.
Mae Dyfodol bellach wedi cyfarfod â Gweinidog newydd y Gymraeg, Alun Davies AC, sydd â chyfrifoldeb am addysg cyfwng Cymraeg yn ogystal. Cawsom gyfarfod cadarnhaol ag ef yng Nghaerdydd, a bu’n gyfle i rannu a thrafod prif flaenoriaethau ein maniffesto. Edrychwn ymlaen at gyd-weithio’n agos a’r Gweinidog dros dymor newydd y Cynulliad. Nodwn yn ogystal ein bod yn trefnu rhagor o gyfarfodydd gyda’r gwleidyddion ar ôl iddynt ddychwelyd i’r Cynulliad ym mis Medi..
Bu cynrychiolwyr y mudiad hefyd yn cyfarfod â Betsan Powys, Golygydd Rhaglenni Radio Cymru, a bu’n gyfle i drafod arbrawf arloesol pen-blwydd deugain oed y sianel. Trafodwyd ein gobaith o ehangu darpariaeth, gan gynhyrchu arlwy sy’n the adlewyrchu holl amrywiaeth cynulleidfa a darpar gynulleidfa’r sianel. Dymunwn bob llwyddiant i’r arbrawf.
Ar Orffennaf 28, cynhaliwyd y diweddaraf o’n cyfarfodydd cyhoeddus yng Nghlwb Rygbi Crymych. Unwaith eto, cafwyd croeso cynnes a thrafodaeth fywiog. Diolch i bawb a fynychodd, a gobeithio i ni eich argyhoeddi.
PLEIDLAIS I ADAEL Y GYMUNED EWROPEAIDD YN DESTUN PRYDER MEWN PERTHYNAS A’R IAITH
Mae Dyfodol yn pryderu am yr effaith y gallasai pleidlais dros adael y Gymuned Ewropeaidd ei chael ar y Gymraeg.
Mae’r Gymraeg yn elwa llawer o gydweithio rhwng cefnogwyr ieithoedd lleiafrifol ar draws Ewrop.
Bu Senedd Ewrop yn llwyfan pwysig ar gyfer cydweithio gwleidyddol er lles y Gymraeg ac ieithoedd eraill fel y profa llwyddiannau diweddar gwleidyddion o Gymru wrth gynyddu statws y Gymraeg oddi mewn i sefydliadau’r Undeb Ewropeaidd ei hun.
Mae Cyngor Ewrop wedi dangos arweiniad drwy hyrwyddo Siarter Ewrop dros Ieithoedd Lleiafrifol a Rhanbarthol sy’n creu dyletswyddau dan gyfraith ryngwladol ar y Deyrnas Gyfunol i hyrwyddo a diogelu y Gymraeg ac ieithoedd brodorol eraill Ynysoedd Prydain ac Iwerddon. Mae cydweithio agosach rhwng yr Undeb a Chyngor Ewrop yn digwydd ac mae hyn yn cynnig posibiliadau cyffrous o ran cynyddu eto fyth statws y Gymraeg.
Os bydd y Deyrnas Gyfunol yn gadael y Gymuned Ewropeaidd mae perygl i’r posibiliadau hynny fynd ar goll.
Gan nad oes darlun eglur o beth fydd natur y berthynas rhwng y DG a’r UE ar ôl pleidlais i adael mae’r ansicrwydd ym maes yr iaith fel ym maes yr economi yn bryder mawr.