Archif Awdur: Ruth Richards

TRAFOD CORFF HYD-BRAICH I’R GYMRAEG GYDA’R GWEINIDOG

Ateb

Cafwyd cyfarfod buddiol a chadarnhaol yn ddiweddar gyda Gweinidog newydd y Gymraeg, Eluned Morgan. Prif destun ein trafodaeth oedd yr angen am gorff newydd i hyrwyddo’r Gymraeg.

Credai Dyfodol ei bod yn hanfodol unioni’r fantol tuag at hyrwyddo’r Gymraeg; creu mwy o gyfleoedd i ddefnyddio’r Gymraeg, ac annog unigolion i’w defnyddio o ddydd i ddydd. Rhaid parhau i gryfhau ac ystwytho’r elfen reolaethol, wrth gwrs, ond heb ehangu’r gwaith yn y maes hyrwyddo, nid oes gobaith gweld cynnydd sylweddol yn nefnydd y Gymraeg.

O safbwynt creu sylfaen cadarn i’r gwaith heriol hwn, credwn bydd rhaid sefydlu corff grymus hyd-braich i arwain ar, a chyd-lynu’r holl amryfal ymdrechion. Rydym wedi llunio taflen sy’n amlinellu ein dadleuon a’n gobeithion, a chewch fynediad ati drwy ddilyn y ddolen isod.

Taflen am Gorff Hyd-braich i’r Gymraeg

Fe baratowyd dogfen arbennig gennym hefyd, ac fe ddosbarthwyd copi i’r Gweinidog a phob Aelod Cynulliad. Gallwch ddarllen y ddogfen isod:

Papur cefnogaeth i Awdurdod Iaith 

YMATEB DYFODOL I GYNLLUN ADDYSG Y LLYWODRAETH

Ateb

Mae Dyfodol i’r Iaith wedi ymateb yn ofalus i Strategaeth y Llywodraeth i ddatblygu addysg Gymraeg dros y pedair blynedd nesaf, er mwyn cefnogi’r nod o greu miliwn o siaradwyr Cymraeg erbyn y flwyddyn 2050.

Mae’r mudiad yn gwerthfawrogi’r gwaith paratoi a wnaed ar y Cynllun, ac yn croesawu’n gynnes y nod a’r ymrwymiad i dwf addysg Gymraeg. Mae’r gydnabyddiaeth bod angen recriwtio athrawon  hefyd yn gam cadarnhaol ac angenrheidiol.

Daw’r cyhoeddiad hwn ar amser allweddol i dwf y Gymraeg, a dywed Heini Gruffudd, Cadeirydd Dyfodol, “Mae’n rhaid i’r Cynllun hwn lwyddo wedi methiant y Llywodraeth i gyrraedd nodau’r gorffennol.”

Aeth ymlaen i ymhelaethu ar hyn:

“Mae’n bryder mawr i ni fod y ganran mewn addysg Gymraeg wedi disgyn mewn 9 sir dros y 5 mlynedd diwethaf. Yn wahanol i’r Llywodraeth, rydym yn amau’n fawr na fydd newid dramatig yn digwydd trwy’r ysgolion Saesneg. Ni allent ddos yn agos at gyflwyno sgiliau iaith cyflawn yn y ddwy iaith, fel y gwna ysgolion Cymraeg.

“Byddwn yn galw felly am i’r Llywodraeth greu rhaglen frys ar gyfer twf ysgolion Cymraeg.”

DYFODOL YN CROESAWU’R PENDERFYNIAD I YMESTYN GWAITH Y COLEG CYMRAEG CENEDLAETHOL

Ateb

Mae Dyfodol i’r Iaith wedi croesawu penderfyniad y Llywodraeth i ymestyn gwaith y Coleg Cymraeg Cenedlaethol i gynnwys y sector addysg bellach.

Mae’r mudiad wedi bod yn dadlau pwysigrwydd y maes hwn mewn perthynas â chefnogi’r Gymraeg fel iaith gymunedol. Dywed Heini Gruffydd, Cadeirydd Dyfodol:

“ Credwn fod hwn yn benderfyniad pwysig, ac yn un i’w groesawu’n gynnes; yn enwedig gan mai siomedig iawn fu’r ddarpariaeth o safbwynt defnydd a hyrwyddo’r Gymraeg yn y gorffennol. Edrychwn ymlaen at weld y sector hwn yn datblygu dan ddylanwad y Coleg, ac yn cyfrannu at y gwaith angenrheidiol o Gymreigio’r gweithle a’r defnydd a wneir o’r Gymraeg.”