Mae Dyfodol i’r Iaith wedi cyflwyno ymateb i’r ymgynghoriad ar y Bil Cynllunio drafft. Mae Dyfodol yn galw am gynnwys y Gymraeg ar wyneb y mesur er mwyn rhoi grym y gyfraith i awdurdodau lleol fedru ystyried effaith datblygiadau ar y Gymraeg.
Gallwch ddarllen yr ymateb yma: Ymateb Bil Cynllunio
Mae Dyfodol i’r Iaith wedi cyflwyno deiseb i Gynulliad Cenedlaethol Cymru yn tynnu sylw at waith y Mentrau Iaith ac yn galw am drefn ariannu deg i’r mentrau.
“Galwn ar y Cynulliad i ofyn i Lywodraeth Cymru:
longyfarch y Mentrau Iaith am eu gwaith arloesol yn hybu a hyrwyddo’r defnydd o’r Gymraeg ar draws Cymru; cadarnhau fod y Mentrau yn bartner allweddol i’r Llywodraeth yng nghyswllt gwireddu ei Strategaeth Iaith; ymateb yn brydlon i arolwg Prifysgol Caerdydd ar waith y Mentrau, gan sicrhau fod y cyllid a roddir iddynt yn adlewyrchu’n deg faint y dasg sy’n eu hwynebu – tra’n derbyn fod angen cynyddu, yn sylweddol iawn, yr arian sydd ar gael iddynt; derbyn bod angen cysondeb rhwng y Mentrau o ran eu hariannu, a bod angen dod â’r anghysondeb presennol i ben; ariannu Mentrau Iaith Cymru yn deg, gan sicrhau ei fod yn gallu chwarae rôl gyflawn wrth gydlynu gwaith y Mentrau a chynnig cymorth ac arweiniad iddynt; sicrhau y bydd y Safonau Iaith yn gorfodi awdurdodau lleol Cymru i gefnogi gwaith y Mentrau, a bod yr awdurdodau yn gweithio’n agos gyda’r Mentrau; chwarae rôl lawn er mwyn cynnig arweiniad strategol yng nghyswllt cynllunio cymunedol.”
Os allech lofnodi’r ddeiseb a rhannu’r manylion gyda’ch cyfeillion byddem yn ddiolchgar
Mae Dyfodol i’r Iaith wedi croesawu ymateb cadarnhaol y Prif Weinidog tuag at gynllunio a’r Gymraeg ar ôl cyfarfod â Carwyn Jones heddiw.
Bu Emyr Lewis, Heini Gruffudd ac Elin Wyn yn cyfarfod â’r Prif Weinidog yn ei swyddfa i drafod cynnwys y Gymraeg ar wyneb y Bil Cynllunio. Dywedodd Carwyn Jones ei fod yn deall ac yn cydnabod bod rhaid i’r Gymraeg fod yn iaith gymunedol gref ac roedd yn agored i ystyried cynnwys y Gymraeg yn y Bil Cynllunio.
Mae’r Prif Weinidog wedi gwahodd Dyfodol i wneud gwaith pellach ar sut yn union y gallai hyn ddigwydd yn ymarferol. Dywedodd Carwyn Jones bod angen edrych yn fanwl ar ddiffinio lle byddai angen ystyried y Gymraeg mewn ceisiadau cynllunio ac a fyddai angen canllaiwau gwahanol ar gyfer gwahanol rannau o Gymru.
Fe fydd Dyfodol nawr yn cynnull tasglu o arbenigwyr cynllunio a’r gyfraith i lunio papur cynhwysfawr i’r Prif Weinidog.
Gallwch ddarllen cyflwyniad Dyfodol i’r Prif Wenidog yma: